സംസ്ഥാനത്തെ അഞ്ച് ദേവസ്വകളുടെ കീഴില്‍ വരുന്ന നിയമനങ്ങളില്‍ ഹിന്ദു മുന്നോക്ക വിഭാഗങ്ങളില്‍പ്പെടുന്ന പാവപ്പെട്ടവര്‍ക്ക് പത്ത് ശതമാനം സംവരണം ഏര്‍പ്പെടുത്താന്‍ 2017 നവംബര്‍ 15ന് ചേര്‍ന്ന മന്ത്രി സഭായോഗം തീരുമാനിക്കുകയുണ്ടായി. ഉദ്യോഗ നിയമനങ്ങളില്‍ സാമ്പത്തിക സംവരണം എന്ന ആശയത്തെ ചൊല്ലിയുള്ള വിവാദം സംസ്ഥാനം രൂപികൃതമായ കാലം മുതല്‍ തുടക്കമിട്ടതാണ്, ഇന്ത്യയില്‍തന്നെ മുന്നോക്ക വിഭാഗങ്ങള്‍ക്ക് സാമ്പത്തിക അടിസ്ഥാനത്തില്‍ സംവരണം ഏര്‍പ്പെടുത്തുന്ന ആദ്യ സംസ്ഥാനമാണ് കേരളം എന്ന് അവകാശപ്പെടുന്ന സര്‍ക്കാരും മുഖ്യമന്ത്രിയും ഇതിന് ആവശ്യമായ ഭരണഘടനാ ഭേദഗതിക്കായി കേന്ദ്രസര്‍ക്കാരില്‍ സമ്മര്‍ദം ചെലുത്തുമെന്ന് പ്രഖ്യാപിച്ചു കഴിഞ്ഞു.
ദേവസ്വം ബോര്‍ഡു നിയമനങ്ങളില്‍ മുന്നോക്ക സമുദായങ്ങളില്‍ നിന്നുള്ള പാവപ്പെട്ടവര്‍ക്ക് സംവരണം ഏര്‍പ്പെടുത്താനുള്ള തീരുമാനം പുരോഗമനപരമെന്നു തോന്നാമെങ്കിലും സംവരണത്തിന്‍റെ അടിസ്ഥാനസങ്കല്പത്തെ ഇല്ലാതാക്കുന്ന ഒന്നാണ് ഇത് എന്ന് നാം മനസ്സിലാക്കേണ്ടതുണ്ട്. സാമ്പത്തികമായി ഉന്നതി ആര്‍ജ്ജിക്കാന്‍ ഏത് ദരിദ്രനും കഴിഞ്ഞേക്കുമെങ്കിലും ജാതിയാഥാര്‍ഥ്യമായിരിക്കുന്നിടത്തോളം സാമൂഹ്യപദവി പിന്നോക്ക ജാതിക്കാര്‍ക്ക് കരസ്ഥമാക്കാന്‍ കാലങ്ങള്‍ കാത്തിരിക്കേണ്ടിവരും. സാമ്പത്തിക സംവരണം നടപ്പിലാക്കുന്ന ദേവസ്വം ബോര്‍ഡിനു കീഴില്‍ത്തന്നെ അബ്രാഹ്മണ ശാന്തി നിയമനം നടത്തിയപ്പോഴുണ്ടായ വിവാദങ്ങളും പ്രതിരോധവും നാം കണ്ടതാണ്. ഇക്കാര്യത്തിലുള്ള ജാതി വിവേചനം ഭരണഘടനാവിരുദ്ധവും മൗലികാവകാശ ലംഘനവുമാണെന്ന് 2002-ല്‍ സുപ്രീം കോടതി വിധി പ്രസ്താവിച്ചിട്ടും ശബരിമലയിലും മാളികപ്പുറത്തും മലയാള ബ്രാഹ്മണരില്‍ നിന്നും മാത്രം അപേക്ഷ ക്ഷണിച്ച് നിയമനം നടത്തുന്ന രീതി ഇപ്പോഴും തുടരുകയാണ്
മുന്‍ മുഖ്യമന്ത്രി കെ കരുണാകരന്‍
സംസ്ഥാനത്തും മുന്‍ പ്രധാനമന്ത്രി പി വി നരസിംഹറാവു കേന്ദ്രത്തിലും കൊണ്ടുവന്ന സാമ്പത്തിക സംവരണം മണ്ഡല്‍ കേസ്സുമായി ബന്ധപ്പെട്ടുള്ള സുപീം കോടതി ഒമ്പതംഗ ഭരണഘടന ബഞ്ചിന്‍റെ വിധിയുടെ പശ്ചാത്തലത്തില്‍ നടപ്പിലാക്കാന്‍ കഴിയാതെ പോയത് ഈ അവസരത്തില്‍ ഓര്‍മ്മിക്കേണ്ടതുണ്ട് ,മന്ത്രിസഭാ തീരുമാനം ഉത്തരവായി ഇറക്കാന്‍ കഴിയാതെ ഭരണഘടനാ പ്രതിസന്ധിയിലകപ്പെട്ടുപോയ സര്‍ക്കാര്‍ ഇപ്പോഴും സാമ്പത്തിക സംവരണ നിലപാട് ആവര്‍ത്തിക്കുകയാണ് , പ്രകടനപ്രതികയിലെ വാഗ്ദാനമായി വ്യാഖ്യാനിച്ച് സര്‍ക്കാര്‍ നിലപാടിന് പിന്തുണ പ്രഖ്യാപിക്കുന്ന രാഷ്ട്രീയ നേതൃത്വം അതേ പ്രകടനപത്രികയിലെ ഇനങ്ങളായ എയഡഡ് മേഖലാ സംവരണവും,സ്വകാര്യമേഖലാ സംലരണവും വിസ്മരിച്ച് സാമ്പത്തിക സംവരണത്തിന് മുന്‍ഗണന നല്‍കുന്നതിലെ രാഷ്ട്രീയം തിരിച്ചറിയാനുള്ള ആര്‍ജ്ജവം കേരളത്തിലെ പട്ടിക പിന്നോക്ക വിഭാഗങ്ങള്‍ക്ക് ഉണ്ടെന്ന് മനസിലാക്കണം
സാമ്പത്തിക നീതിയുമായി ബന്ധപ്പെട്ടുള്ള കാര്യങ്ങള്‍ സാമൂഹ്യ നീതിയുമായി ബന്ധപ്പെടുത്തി പരിഹാസിക്കാന്‍ ശ്രമിക്കുന്ന സര്‍ക്കാര്‍ ഭരണഘടനാ ഭേദഗതിക്ക് കേന്ദ്രസര്‍ക്കാര്‍ തയ്യാറായാല്‍ മുന്‍കൈയ്യടുത്തവരെന്നയശ്ശസും ഫലവും നേടുന്നതിനുവേണ്ടി ശ്രമിക്കുമ്പോള്‍,രാഷ്ട്രീയ തുല്യതയ്ക്കും അവസര സമത്വത്തിനും വേണ്ടിയുള്ള ഭരണഘടനാ പരിരക്ഷ ഇല്ലാതാകുന്ന പട്ടിക പിന്നോക്ക വിഭാഗങ്ങള്‍ കേരളത്തില്‍ നിന്ന് ഇതുവരെ കാണാത്ത ഒരു സംവരണ പ്രക്ഷോഭത്തിന് തുടക്കം കുറിക്കുകയാണ്,ഡിസംബര്‍ 10-ലെ മനുഷ്യാവകാശ ദിനത്തെ മുന്‍നിര്‍ത്തി 11ന് സംഘടിപ്പിക്കുന്ന സംവരണ സംരക്ഷണ റാലിയിലും സെക്രട്ടറിയേറ്റിനു മുമ്പില്‍ ചേരുന്ന പ്രതിഷേധ സംഗമത്തിലും കുടുംബങ്ങള്‍ അടച്ച്,തൊഴിലുപേക്ഷിച്ച്,പഠിപ്പുമുടക്കി പട്ടിക പിന്നോക്ക വിഭാഗങ്ങളുടെ ഇതിഹാസമാവുന്ന സാമൂഹ്യ നീതി പോരട്ടത്തില്‍ അണിനിരക്കാന്‍ അഭ്യാര്‍ത്ഥിക്കു ന്നു....
അഭിവാദനങ്ങളോടെ
പട്ടികജാതി-വര്‍ഗ്ഗ സംയുക്ത സമിതി സംസ്ഥാന കമ്മിറ്റി
